Cerkak Basa Jawa "Nggapai Angan-Angan"

NGGAPAI ANGAN-ANGAN

            Kring... Kring... !!! tibake uwis jam setengah 5 pantesan wae alarmku muni, awakku rasane abot banget arep tangi, mripatku rasane ya panggah kudu merem. Tapi kudu tak paksa tangi tinimbang ibukku mengko nyeneni. Aku banjur nata kasurku lan adus, rasane banyu sing adem iki marakne awakku sing sakdurunge lemes dadi seger lan semangat. Sak uwise adus aku mambu sing enak saka pawon, eh... tibake ibukku lagi masak, aku banjur nakoni ibuk.

            “Buk.. panjenengan masak napa lo niku kok kadosipun eco sanget?”. “Iki lo le, ibuk lagi masak oseng kangkung sing dadi senenganmu, ya ngono le wis adus malih ketara bagus." “Hehehe... Inggih buk”. Ibukku iki nyatune enak banget lek masak, apa wae sing dimsakne ibuk akup panggah seneng ndak pilih-pilih. Ibukku saiki uwis dadi randha amarga ditinggal bapakku seda 5 taun kepungkur. Saiki aku ning omah mung karo ibukku lan adikku lanang sing saiki isik sekolah kelas 5 SD, dadine kabeh-kabeh saiki sing mbiayai urip lan sekolah anak-anake ibukku. Masiya saiki urip pas-pasan amarga ibukku ya mung nduwe toko cilik kanggo golek nafkah, tapi aku sekeluarga tetep syukur marang gusti

            Uwis enek jam setengah 7 aku banjur pamitan ibuk arep budhal sekolah. Aku boncengan motor karo adikku, adikku sekolah ana ing SDN 1 Sukoanyar sing ora pati adoh saka omahku. Adikku iki kalebu bocah sing pinter ing sekolahane amarga kerep rangking kelas, bocahe uga ora nakal lan manut karo omongane wong tuwa dadi aku bersyukur banget nduweni adik kayak ngono. Aku dhewe saiki sekolah ing SMAN 1 Sukoanyar, saiki aku wis kelas XII. Aku milih jurusan IPA amarga seneng karo itung-itungan kayak piwulangan Matematika lan fisika. Kels XII iki taun penentuan amarga bariki wis arep metu saka SMA lan golek sekolah lanjutan sing dikarepake.

            Aku dhewe isih bingung sok arep nerusne sekolah ning endi, ning kelas aku ditakoni kancaku jenenge Budi. “ Toni, awakmu sok lek wis bar lulus arep nerusne sekolah ning endi?” Aku banjur nyauri, “Emboh ya Bud, aku dhewe kok isih bingung urung nduwe pilihan arep ning endi bariki”.”Lha awakmu  dhewe arep nerusne ning endi Bud?” Aku balik nakoni Budi. “Aku pingin njajal daftar ning STAN Ton, soale sekolah kui termasuke sekolah ikatan dinas dadi misale bar lulus bisa langsung nyambut gawe.”Krungu jawabane Budi aku malih penasaran apa kui STAN, bubar kui aku nyoba golek info lewat internet lan takok ning guru BK sekolah.

            Ning Ruang BK aku nyoba takok ning guruku BK yaiku Bu Nur Indah. “Bu... kula badhe nyuwun pirsa, STAN niku sekolah ingkang kados pundi lan menawi badhe daftar pripun carane?” “STAN kui salah sijine sekolah ikatan dinas sing manggone ana ing Jakarta, lulusan sekolah kui langsung bisa nyambut gawe ana ing cabang-cabang kantor Kemenkeu. Cara dhaftare dhewe ana ing regio dhaerah dhewe-dhewe, kebetulan dhaerah awake dhewe ana ing Malang. Awakmu pingin nyoba dhaftar ning STAN Ton?” “Inggih bu InsyaAllah, kula kepincut dhaftar STAN.” “Owalah... ya apik kui, awakmu dhewe ya wis pinter, muga-muga wae bisa kalebu ning kono, sing penting kudu telaten sinau, terus ojo lali donga lan njaluk restune wong tuwa.” Dhawuhe guruku. “Inggih bu, matur nuwun”. Aku banjur pamit lan mbalik ing kelas.

            Mulihe sekolh aku crita ning ibuk ngenani STAN kui. “Bu.. sakniki kula sampun mantep bibar lulus SMA kula badhe dhaftar wonten STAN.” “Iya le, apa wae sing kok karepake ibuk InsyaAllah bakal wenehi restu marang awakmu, sing penting awakmu sing sregep lek sinau, dongane ya sing kuat, soale awakmu saiki ngerti dhewe ibukmu ya mung ngene iki ndak nduwe apa-apa, kui dadekna semangat kanggo awakmu muga-muga dongamu diijabah Gusti Allah lan awakmu bisa sukses.” “Inggih bu.. matur nuwun sampun maringi restu dhateng kula.” Bar kui aku malih sregep sinau lan nyoba soal-soal seleksi STAN kanggo nyiapne tes besok.

            Pirang-pirang sasi sak uwise, akhie aku uwis lulus saka SMA lan arep siyap-siyap tes seleksi STAN. Seleksine dhewe manggon ing Balai Diklat Keuangan (BKD) Malang. Tes STAN dhewe dibagi ana 3 tahap. Tahap 1 tes tulis, tahap 2 tes kesehatan lan tahap 3 tes wawancara. Tibake akeh banget sing melu seleksi mlebu STAN, tapi aku ndak minder amarga aku yakin karo kemampuanku dhewe. Sak uwise lulus tes seleksi sing ana 3 tahap kui mau alhamdulillah aku akhire ketampa sekolah ning STAN jurusan perpajakan. Aku bersyukur banget amarga iso bisa mbanggakake wong tuwa lan bisa nggapai angan-anganku.

Dening

Bima Wahyu Raebawa

Desa Baruharjo, Kecamatan Durenan, Kabupaten Trenggalek

083111977556

bimarae13@gmail.com

SMAN 1 Durenan Trenggalek